Mánfer de la Llera

LA NUEVA ESPAÑA

Sábado 07 de mayo de 2011     

Selmana / Dia de les Lletres Asturianes

Mánfer de la Llera, exemplar

En recuerdu d'un autor filosóficu, reflexivu, intimista y social

ANTÓN GARCÍA La primer vez que vi a Mánfer de la Llera foi nun recital de poesía qu'organizaba Conceyu Bable na Escuela de Mines de la Universidá d'Uviéu. Mui a primeros de los años ochenta, nun actu con bastante públicu, nun se llograba'l mínimu de silenciu pa empezar, porque llegaben voces dende'l pasiyu. Mánfer, sentáu a la mesa, dispuestu a recitar, sesenta años, voz potente y modulada, féxose oyer: «Pesllái la fueya d'esa puerta». Yera la primer vez que sentía la palabra fueya con esi sentíu, y tamién la primer vez qu'oyía a una persona mayor falar n'asturianu nuna situación formal y pública. Cuando dalguién zarró la puerta, Mánfer empezó a recitar y lleó, con voz cadenciosa y posada, el so poema «Les hores muertes», ente otros.

Nun yera un poeta desconocíu pa min. Nos rataos que pasaba na Biblioteca Provincial d'Asturies, situada daquella nel Palaciu de Porlier d'Uviéu, dedicáu a repasar con minuciosidá les colecciones de llibros n'asturianu que guardaba, yá tuviera la oportunidá de lleer les dos obres que sacara esti autor nos años cincuenta: Poesía de la mina (1952), n'español, y Cuentos en verso asturiano (1953), un llibru d'humor escritu na fala de la zona de Llangréu. Sicasí, el poeta que sentía recitar naquel momentu nun asturianu «ensembre» tenía poco que ver col poeta festivu de trés décades p'atrás. Filosóficu, reflexivu, intimista, social, taba dándome cuenta, según lu sentía, de que Mánfer de la Llera yera l'exemplu más evidente de cómo cambiara la mentalidá del escritor asturianu, d'esi ciudadanu que se conocía col nome xenéricu de «bablista», que tenía varios significaos.

Dicía´l pensador valencianu Joan Fuster que s´escribe como hai tradición d´escribir. Nos años cincuenta la poca poesía n´asturianu que se publicaba siguía la llinia festiva que practicaben Antón García Oliveros y Anxelu: humor blanco, un poco de sal gordo de xemes en cuando, dalguna picardía y mui poco más. Neso diera la famosa llamada de 1944 de Constantino Cabal en favor del cultivu del asturianu: «Poetas de Asturias –vosotros, los de fuerzas más valientes e inspiración más copiosa– volved las manos al bable como a un rosal en plena floración». Nun me cabe dulda nenguna de que la lenta apaición d´escritores nesa época pel territoriu asturianu ye respuesta al llamáu de Cabal: Mieres (Luis Aurelio, Samuel Iglesias, César Rubín...), Ayer (Pepe Campo, Elvira Castañón...), Xixón (José Avelino Moro, Octavio Triviño...).

Nel valle del Nalón tamién hai un brotu de lliteratura nesta llingua per esi tiempu: el propiu Mánfer, José León Delestal, Sarafo Sarrellana, Mino Fuenteseca, Silvino Arias. De toos ellos, y d´otros munchos autores de posguerra que más tarde, pelos años sesenta y setenta s´asomaron a la producción lliteraria n´asturianu, ye Mánfer de la Llera l´únicu que se suma en cuerpu y alma al cambiu de mentalidá, verdadera revolución cultural que sutrumió los cimientos d´una sociedá acomodaticia y provincial, que proponía Conceyu Bable, una asociación de la que llega a ser presidente nos años ochenta.

La publicación agora de diversos materiales sobre la vida y la obra d´esti activista social permítenos llograr una perspectiva bastante completa del so llabor lliterariu nel contextu vital y social nel que se desarrolló. Asina, resulta del mayor interés saber que´l ciudadanu Manuel d´Andrés Fernández, que naciera nes Cuestes, Ciañu, en 1918, ye un obreru que trabaya dende los ocho o nueve años p´axudar a una menguada economía familiar. Viende periódicos pelos pueblos altos del Conceyu de Llangréu, y dende los dieciséis trabaya na mina, entrando de rampleru, pa dir escalando posiciones a lo llargo de la vida nel escalafón: picador, camineru, entibador, barrenista y vixilante de preparación, que ye como se xubila (1967) por incapacidá llaboral.
Tóca-y vivir la Revolución Obrera de 1934, y cuando españa la Guerra Civil en 1936 movilízase en defensa la llegalidá republicana. Al cayer el frente d´Asturies empieza un pelegrinaxe de tres años, como presu de guerra franquista, per distintos campos de concentración y batallones de trabayadores. Yá de vuelta a casa, regresa a la mina, que compaxina colo que ye la so verdadera vocación: la escritura. Son los periódicos los que-y permiten escribir sobre mui distintos temes: cróniques deportives, humor, asuntos mineros, sociedá... Cuando marcha a vivir a Madrid por motivos profesionales, o cuando vuelve y s´instala cola familia en Xixón, nun dexa de colaborar en distintes publicaciones periódiques. Una y bones xubiláu, pasa a ser coordinador de l´Agrupación Rexonal de Pensionistes d´Asturies (ARPA), una asociación que va protagonizar un sonáu enciarru na igresia de San Xosé de Xixón en 1971 (y que cuenta agora ún de los sos protagonistes, el catedráticu de la Universidá d´Uviéu Jesús Menéndez Peláez, nel llibru homenaxe a Mánfer que publica´l Principáu d´Asturies al dedica-y la 32 Selmana de les Lletres, «Mánfer de la Llera, de la rampla a la pluma»). En terminando´l so llabor al frente de l´ARPA, en 1980, la producción lliteraria de Mánfer crez y empieza a publicala ordenadamente. Cuando muerre en Xixón nel añu 2005, Mánfer ye una figura emblemática del movimientu de recuperación cultural d´Asturies. Dexa tres d´él miles de páxines escrites n´español, productu d´un esfuerzu consciente de superación personal, convirtiéndose nel mineru poeta. Queda tamién l´exemplu del so compromisu social y llingüísticu, que tien continuidá nel llabor de los sos fíos Vital y Ramón d´Andrés.

Pero sobremanera queda´l so trabayu lliterariu, que se presenta agora na antoloxía En cata de la mio lluna (Trabe/Principáu d´Asturies, 2011), n´edición preparada y prologada por Severino Antuña, que fai un escelente trabayu. Ehí tán dalgunos de los poemes escritos nos años cincuenta, superaos pola obra qu´escribe Mánfer dende finales de los años setenta, cuando yá ye reconocible la so voz poética: disciplina métrica, preferencia pol narrativismu esplicativu frente al lirismu, un ciertu didactismu y la busca consciente de crear un vocabulariu poéticu asturianu, precisu y anovador. Severino Antuña señala nel prólogu, acertadamente, que l´ideariu poéticu de Mánfer «reivindica´l llirismu de los espacios escuros, onde la única vida qu´hai vien de fuera y nun xorrez, mengua o piérdese dafechu». L´antoloxía complétase con una breve amuesa d´obra en prosa: cuentos, cróniques y suaños.

Nes más de cuatrocientes cincuenta páxines d´esti llibru queda resumida la historia de la lliteratura asturiana de posguerra: el costumismu inicial, la posterior defensa de lo asturiano y de la so llingua, la reivindicación social, pa terminar esplorando la propia intimidá. Participativu y candial, animosu y seriu, Mánfer de la Llera dexónos el testimoniu oral (los que lu conocimos) y escritu de cómo hai qu´entender el compromisu cola cultura. Quiciabes porque venía d´una familia humilde, porque la so participación como protagonista na vida cultural asturiana foi a resultes d´una fonda toma de conciencia y d´un esfuerzu consciente, siempre se mostró humilde y xenerosu, trabayador y comprometíu. Un exemplu.